自從政府總部搬往添馬艦之後，位於金鐘太古廣場，中信泰富大廈，海富中心等食店，生意大增，高官當然去中信海都、萬豪、夏宮、金葉庭之類，中下層就去西式餐廳、快餐店。呢日中午時份，左丁山行經金鐘廊，就碰到一位公務員食完飯，周圍岳，狀甚輕鬆，好難怪嘅，做官唔高唔低，唔駛去立法會飽受壓力，人工又有六至十萬元嘅，好多時可以準時放工，幾輕鬆㗎。以前就有一位相識，做到有資格去立法會，去過幾次就怕怕咯，一於拒絕升級，堅決做副手做到退休，回想起來，佢真係先知先覺。一啲人士爬上高位坐正啫，立即被報紙揭舊賬，以後三四十年難以釋懷。
金鐘廊碰到公務員，識得嘅，同佢打招呼之餘，佢居然問左丁山一句：「喂，我地時興話食甜品唔好再食番薯糖水，要改吃涼粉呀，你鍾唔鍾意食涼粉呀，食得就有前途。」真係弊，左丁山腸胃唔食得涼粉，試過一次貪嘴吃咗半碗，到咗晚上就在廁所出出入入，以後不敢再試，但一位校友好鍾意食，涼粉加雪糕就最正，食兩碗面不改容，腸胃完全冇反應。
公務員哈哈大笑：「唔敢食涼粉，今日冇前途，政府嘅諮詢委員會委員一定冇你份！」冇咗好多年啦，做嚟做乜噃，又冇錢嘅，得個忙字。公務員話：「你嘅態度唔啱嘞，香港勝在有好多人為政府做義工，一味出力，不問金錢報酬，有時甚至為委員會工作被人鬧爆，如果人人好似你咁懶，啲委員會冇法子運作啦，譬如教資會，警監會、消委會、城規會……好多好多，要搵一啲有資格人士捱義氣㗎！」唔，正如佢咁話，係捱義氣做義工，但依家如無高靜芝格過，想報效社會都未必得噃，公務員講：「過往特首鎮得住，打個眼色唔駛出聲就有部門局長識做，懂得搵乜人入乜委員會，梁生上台後，唔知點解各部門都唔係幾明白如何睇佢嘅眼色、面色，硬係搵唔到一啲鍾意食涼粉嘅人士入委員會，咪逼到梁生出聲委派高女士做吓嘢囉！」原來如此，咁講法，食得涼粉有着數。問公務員鍾唔鍾意涼粉，佢又哈哈大笑：「我係冇官升㗎嘞，鬼叫我平時喜歡食朱古力糖！」