咖哩牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
上周六食晚飯時邊睇電視做餸，香港免費台「1哥」先好有良心咁製作香港貧富懸殊問題嚴重嘅新聞節目，一家幾口屈埋一百幾十呎板間房；轉到下一個節目就介紹香港豪戶，複式單位幾層加埋幾千呎，用過千萬裝修嘅豪氣，就好似摑半個小時前先上鏡嘅貧苦小市民幾巴掌咁。
曼城，算得上英超，甚至全世界最有錢嘅足球球會，阿布扎比油王不問成本投資。不過周日作客阿仙奴之戰，曼城球迷會就投訴，阿仙奴提供嘅客隊門票高達62鎊，結果有近千張退票；周日之戰完結後，曼城更有球迷在阿聯酋球場高舉橫額，批評英超門票太貴。先不評論阿仙奴有冇因為曼城系出豪門，所以將票價刻意提高，但曼城球迷就好似香港小市民咁，球會急速發展豪華化，不過球迷嘅受惠唔多。
英國嘅傳統經濟重心一直喺倫敦，中部城市伯明翰算較多中產人士居住，西北部城市曼徹斯特同利物浦，只屬工業城市，平均人口收入及唔上倫敦。曼市已經彈出曼聯，吸納一批中產客，並步向國際化，入場球迷更推廣至全英國、全歐洲以至全世界。曼城傳統上屬曼市本土球迷所支持，球迷平均收入也及不上曼聯，但油王入主後，硬件無疑不斷提高，伊蒂哈德主場美輪美奐，世界各地頂級巨星亦相繼加盟，但球迷沒有因此而富有。曼城入主初期，還不問成本維持低成本門票，但始終歐洲足協要求球會收入與支出成正比，藍月亮門票也要被迫提高。惡性循環的情況是，曼城戰績越來越好，但卻越來越背棄了一直支持的鐵桿球迷。文：牽牛