真係排住隊咁嚟停唔到，「撐同志，反歧視」嘅風氣，連「西太后」都齊心撐。世界殿堂級時裝設計師Vivienne Westwood（西太后）噚日都揸住寫上中文「撐同志，反歧視」嘅電話，向世界展示佢嘅立場。
黎明 林夕 范曉萱支持
向來都係潮人嘅填詞人黃偉文，前晚喺佢facebook post咗呢張西太后撐同志嘅相，短短一日已經有成1,000人like，400人share出去，唔少人都話應該係Wyman呢位服裝界潮人穿針引線，先至請到西太后出馬，用中文撐同志。Wyman拋下一句：「她也支持，她說她一直都支持！」唔少網民都嘩嘩聲，感謝西太后越洋發功。
除咗西太后，娛樂圈更加係一個撐完一個又一個，范曉萱、黎明、林夕、梁詠琪都紛紛表示支持。大愛同盟個fb Page幾日已有逾7,000人like咗。發起同盟嘅何韻詩喺fb話：「感謝各方好友聲援，為平等社會發聲！」
噚日喺大愛同盟嘅fb Page，一對夫婦喺反對就同志平權諮詢嘅「愛家共融祈禱音樂會」上，舉起電話，拍咗張「撐同志，反歧視」嘅相，男嘅話：「聽着台上的人的發言，一堆堆謊言和歪理，只能默默地心痛。」佢仲話，影呢張相唔係要「踩場」：「只是想告訴所有LGBT或未出櫃的朋友，基督徒之間也有人會以關愛先行，會站出來為你們發聲的。」
mailto:[email protected]