1963年啟用嘅伊利沙伯醫院（QE），踏入50周年金禧紀念，醫院噚日搞咗個「五十周年誌慶開幕典禮」，為一連串紀念活動揭開序幕。作為一間急症全科醫院，醫護隨時要參與大災難救援，醫管局主席胡定旭致辭就提到，舊年南丫島海難嘅凌晨時分，同特首去巡QE時嘅一個小故事，令佢深刻體會醫護時刻關心病人，令佢非常感動。
肥胡話，當時有名海難傷者想打電話畀家人報平安，但手機濕晒開唔到，有護士見到即刻幫佢拆開部機拎張sim卡出嚟，放入自己手機畀佢打。
醫護人員「借殼」幫人，真係好細心，八方幾時都話香港嘅醫護人員係專業抵讚。