【本報訊】去年9月，「細股王」瑞信證券研究部董事劉紹文最先叫買中國經濟復蘇概念股，4個月後，他認為已有股份透支了這次復蘇概念的升幅，警告這批公司稍後公佈業績若「唔夠靚仔」，跌幅可以很厲害，他更指今次的升浪已過了一半，隨時於第二季玩完。
記者：石永樂
劉紹文重申，今次內地的復蘇有別於09、10年的結構性復蘇，而是屬於周期性復蘇，「周期性復蘇主要由補充庫存帶動，升勢一般維持兩至三季。」以此計算，升市已到中段，「去年9月至12月中係懷疑期，𠵱家係第二期，大家確認見底，大市成交增加，股票升得快。」
公佈業績見真章
經過年初與一些具指標性的公司溝通，劉紹文初步得出的結論是，形勢無特別問題，「一切係意料之內，但唔覺得有特別驚喜。」他下一步要看的，是企業將公佈的業績，「𠵱家仍處於遐想憧憬期，但再過多幾個月，就要睇係咪有實際改善，睇實際業績表現。」劉紹文續指，現時不少股份的股價已經跑先3、4個月，如果到時公司業績不達標，又或者管理層對前景顯得不太樂觀，屆時的股價可以跌得很厲害，此外，若果美國經濟復蘇速度遜於市場預期，亦是今年另一主要跌市風險。劉紹文一再強調目前一切正常，其中一個原因是基金經理未算很瘋狂，「我估計，𠵱家基金經理嘅（持貨）倉位仍未好足夠，尤其係舊年有啲慢咗少少。」他又指到，去年上半年史上最多盈警股，但稍後可能出現不少盈喜股，原因是今年首季的經營環境較去年同期有明顯改善，「到時可能又借勢炒作」。
搵緊牛市三期時間
雖然仍然有買貨的理由，但劉紹文直言，「以揀股難度計，升市已經過咗一半。」劉紹文最近走專注的，不再是發掘會爆升的細股，而是「搵緊第三期幾時出現。」那第三期有何徵兆？「第三期係爆發得好快，禾雀亂飛，啲細價股、甚至不知名嘅股都升，嗰陣就要準備走。」不過他提醒，由於股價跑先3、4個月，因此大市見頂時坊間的數據及經營環境可能仍然很理想。至於有何股份可以「避之則吉」，「今次跑輸大市嘅公用類股份啦，其次係一啲舊年升得多，大型消費股同出口股，呢啲估值唔平、多基金持貨嘅，如果業務少少放緩，或者業績不如市場預期，好容易被投資者獲利。」劉紹文少有的教人避險。