盈大地產（432）上周五失驚無神爆升25%，係咪單純因為傾緊投資印尼地產項目？老老實實，晉佳對呢個消息有幾着數實在一知半解，只知道隻股喺李澤楷手上，一定玩吓財技。
當年盈大係電訊盈科（008）地產旗艦，但賣完貝沙灣之後都冇乜大作。盈大上星期五咁大棍升完，市值都係得9.35億元，睇番舊年年報，佢長期高負債，達25億元，同時Cash又多，約28億元。老細小小超貴為財技高手，當然會好好利用呢筆Cash，然後由得負債留喺公司，只係未反映喺賬目上面。
盈大舊年3月公佈一項做法相當罕有嘅交易，其後獲股東通過，做法係用每股1.85元向股東公開回購股份，然後註銷，公司最後回購約8.25億股或34.26%，當時冇接受回購、依然喺市場上嘅股份就只有1億股左右。
防震倉 等調整再吸
由於已發行股本基數細咗，交易過後，電盈持股量大增至93.59%，貨源歸邊，為咗解決公眾持股量唔夠25%嘅問題，盈大向股東1派4紅股，股東亦可以選擇收取紅利可換股票據，最精警係電盈可以從中選擇收取紅利可換股票據，而唔直接收取紅股，自己冇蝕底之餘，公眾持股量亦可以回復至25%以上，他朝又可以將票據變番做股份。上述動作完成後，盈大就5合1股，將股價還原，成件事靜雞雞完成咗。
紅利可換股票據行使價係0.50元，𠵱家股價2.35元，單睇呢點，散戶𠵱家買入，照計處於一個相當不利嘅情況。不過，成單交易完成後嘅結果，係願意以1.85元沽貨嘅散戶，一早已經沽晒貨畀盈大，然後註銷，市場上已冇乜人願意低過1.85元沽畀你。換言之，喺1.85元附近持有，理論上係安全，至於上升空間，由於電盈已經Corner晒啲貨，做咁大場大龍鳳，斷估想炒上去，所以基本上不設上限。
股價單日升咗25%，要預咗有向下震倉嘅危機，最好等調整先買，同埋呢啲投機嘢，細細注就算。
晉佳
本欄逢周一、三及五刊出