滙豐亞太區業務策略及經濟顧問梁兆基外表嚴肅，原來都有幽默一面。
上周五佢喺一個論壇妙語連珠論歐美經濟，以打麻雀嚟形容歐洲經濟大局，指歐洲唔似得美國咁，可以貶值谷出口，「𠵱家德國一家贏三家，想畀佢哋（歐洲小國）贏，即係要德國輸，德國實唔肯出沖呀、大相公咁樣輸畀你。」此言一出，全場掌聲雷動。
對於市場最近傳出美國可能提早加息，佢就兜頭潑冷水，「美國經濟好似垂死病人咁，電一電所以佢醒一醒咋嘛。」至於財政懸崖雖然傾掂咗，但係未解決，只係「遲啲再傾過」。佢承認，歐美經濟最壞時刻過咗，之但係「我冇話過最好時刻嚟緊呀」。
講完歐美，點都要評埋強國啦。梁兆基認為，歐美唔掂，中國出口都冇乜運行，仲叫啲賓架「有定單上半年好接晒佢」，佢估計，下半年冇上半年咁好市。中國保八要靠自己，除咗成日講嘅內需，強國仲要靠基建工程谷經濟。