【本報訊】無綫《十大勁歌金曲頒獎典禮》昨晚舉行，由於沒四大歌手撐場，淪為英皇和星煥頒獎禮。無綫旗下藝人、失落視帝的林峯獲無綫呵番首膺最受歡迎男歌星重拾威風，而鍾嘉欣和陳法拉等也得獎。容祖兒破紀錄成為最受歡迎女歌星八連霸，人氣下滑的台灣組合LOLLIPOP F則爆冷奪亞太區最受歡迎男歌星獎。
記者：馬建華 王連連 胡比
無綫《十大勁歌金曲頒獎典禮》昨晚在將軍澳電視廣播城舉行，雖然無綫跟四大唱片已解決版稅問題，但四大拒絕簽約被無綫綁死，故旗下歌手如陳奕迅、李克勤和方大同等依然冇得玩，由於英皇跟無綫友好，星煥老闆何哲圖則是無綫高層余詠珊的老公，令《勁歌》淪為英皇和星煥頒獎禮，星煥共得7獎，英皇則共得13獎。
一如本報披露，林峯昨晚橫掃三大獎（詳見附表），去年失意視帝的他因古巨基不出席冇獎，讓他首嚐最受歡迎男歌星滋味，兼奪金曲獎和華語歌曲銅獎。首奪最受歡迎男歌星的林峯，台下未公佈已戴好耳機，一早知攞獎，他說：「咁多年有機會企喺台上，未真正多謝屋企人，我諗住謝埋票，多謝咁多年支持我嘅fans，只要有一日企喺舞台都將最好帶畀你哋。」
着銀色tube dress的祖兒則成為最受歡迎女歌星八連霸，又奪廣告歌曲獎、金曲、合唱歌曲等共4.5獎成大贏家，八奪女歌星的她說：「等候宣佈個心卜卜跳，我出道到今日算勤力學生，有時都幾攰，今晚歌迷、親人、朋友畀鼓勵我，好似呢條裙腰封撐起我。」
LOLLIPOP F爆冷奪亞太
亞太區最受歡迎男歌星由台灣組合LOLLIPOP F爆冷奪得，四子由棒棒堂分拆出來，當年棒棒堂曾走紅香港，惜只曇花一現，更被黃貫中狠批「棒棒堂三年後仲喺度至再講！」棒棒堂真捱唔到三年已拆夥，LOLLIPOP F在港台人氣急速下滑。亞太區最受歡迎女歌星由Twins重奪，蔡卓妍（阿Sa）哽咽說：「第一次攞呢個獎係07年，中間我哋各自各發生好多事，有唔同經歷。」鍾欣桐都谷淚說：「呢個獎唔容易。」
谷胸襯黑絲的王菀之宣傳今晚播出的新劇《老表，你好嘢！》，咁識做難怪《留白》獲頒金曲金獎，她表情愕然說：「真㗎？嚇死我，呢個真係冇諗過得獎，個腦𠵱家係留白。」
昨晚也發生頒錯獎瘀事，當宣佈男新人獎時，司儀崔建邦竟擺大烏龍，講錯獲銅獎的羅力威攞金，獲金獎的胡鴻鈞攞銅，嚇到台下即提醒更正，志偉說：「阿邦咁玩我哋！」羅力威呆一呆拍心口說：「其實攞銅都好開心。」其所屬公司英皇高層都發笑。
G.E.M.寸爆：大蝦細
之前寸爆叱咤玩小圈子的G.E.M.，因無綫高層李寶安和商台CEO陳志雲對着幹，昨晚獲無綫厚待打頭陣攞金曲獎，她再寸說：「呢個係我TVB第一首金曲獎，社會上太多唔公義事情，歧視、大蝦細、打壓，大家唔好屈服，無論你乜身份地位都有權去爭取。」
星煥歌手也因老闆是余詠珊老公關係帶挈獲獎，身兼無綫親生女的鍾嘉欣獲金曲、已約滿星煥的陳法拉也因是親生女獲新人薦場飆星獎、巨聲幫許廷鏗獲金曲及最受歡迎改編歌曲、鄭欣宜獲傑出表現金獎、Super Girls獲新人銀獎；無綫老闆陳國強旗下唱片公司歌手蔚雨芯獲女新人銅獎，自己人全部有獎。至於五大唱片之一的bma跟無綫修好，周國賢和Gin Lee都有獎。
【2012年度勁膠金曲頒獎禮】
可能係今年最公正嘅頒獎禮，保證冇內定冇黑幕，快啲去投選你心目中今年最膠嘅歌曲啦！本月20號將揭曉誰是最膠XD
→ http://campaign.appledaily.com/2012awards
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 (電腦版)
http://bit.ly/ent_m2012 (手機版)