港股炒到癲，散戶蜂擁入市，Samantha明白唔應該為雞毛蒜皮的小錢計較，但針拮到肉，終於識痛。上周為新一年首次5天工作，周末打算換「搭十送一」免費票之際，發覺優惠已遭「回程9折」取代，計完婆乸數後，強烈要求港鐵公司（066）畀番「十送一」嚟！
「十送一」原為去年港鐵加價後，為平息民怨所推出的優惠，大家本着「好過冇」心態硬食。事隔半年，港鐵再諗縮數轉為「回程9折」，若觀塘出發到中環，一周10次要畀125蚊，「十送一」下免費搭一程12.50元過海，平均每程11.40元，拉勻計大約九折。在新優惠下，同樣情況折後每程平均11.875元，變了九五折。
睇番港鐵業績，2012年上半年車費收入為68.5億元，按年增7.1%；但車站租金和廣告收入按年增11.3%達17億元。計人流，港鐵贏晒，若計租金增幅，則連做屋邨生意的領匯（823）都跑唔贏。港鐵，凡事要識得開源，成日向乘客伸手，諗縮數冇出路㗎！
Samantha
本欄逢周一、三、五刊出