所謂「好波不如好運」，如果冇運嘅話，真係好擇使；好似阿士東維拉嘅領隊林拔咁，就堪稱係呢期英超嘅地獄黑仔王。除咗林拔，喺上周六嘅英超，連擺兩球烏龍嘅約拿芬禾達斯亦要幾黑、有幾黑。
維拉自嚿年12月中之後，就運勢轉沉，喺聯賽俾車路士大炒8蛋後，諸事不順，近7場得1勝1和5負；最慘喺上周六迎戰修咸頓嘅聯賽，俾修頓嘅積洛迪古斯插水博12碼成功，咁就輸0:1。目前維拉以22戰得19分跌到落尾3，正式要踢護級戰。
「球證睇番好尷尬」
賽後林拔就好㷫咁話：「我唔能夠怪麾下球員，佢哋全場嘅表現，特別係下半場，實在出色；可惜我哋輸咗俾一個唔存在嘅12碼！其實以球證賀斯嘅經驗同埋資歷，冇理由會判12碼，相信佢睇番重播時，一定會好尷尬。」林拔亦坦言球隊要踢護級戰，而且佢仲預計戰況會好慘烈㖭！
另外，由於維拉呢期實在太頹，林拔仲成為「下一位離隊領隊」嘅太熱，賠率得1.44倍，而維拉會喺今季降班嘅賠率，亦只係得1.8倍。