【上市公司專訪】
近年工業股被金融海嘯、歐債危機及最低工資打得遍體鱗傷，不少更被迫離場，有幸留低的也有其難念的經，以精電（710）行政總裁蔡東豪為例，他變身廠佬七年多，但卻遇上工業界最困難的一面，即使用高於標準的工資請人，旺季仍然請唔到人，但阿Q的蔡東豪指，「每個做廠嘅都要面對𠵱家嘅困境，冇例外……只好呢度掃一啲、嗰度掃一啲，好似掃餅碎咁。」 記者：石永樂
蔡東豪管理的精電，是全球汽車顯示屏最大的生產商，廠房位於跟香港有三個半小時車程的廣東省河源市，坐慣辦公室的他每星期都會在河源過一晚夜，亦因為廠址相對偏遠，精電要面對的員工供應問題已不算大，「我哋有七成嘅女工係本地人，流動性較小。」他又指，精電提供的工資較標準多一點、編更又好一點，所以大部份時間都請到工人。不過，「旺季某幾日、某幾個禮拜都會請唔到人……但可以manage（管理）到，東莞連人都請唔到呀！」
搞汽車顯示屏 贏得大客
雖然河源的最低工資較東莞的低逾兩成，但過去幾年員工的工資每年平均加約20%，最識計數的蔡東豪馬上分析員「上身」，假設工資代表工廠20%收入，過去幾年每年人工加20%，每年對純利率衝擊4%，但好多工廠的純利率就只有4%。除了人工，蔡東豪直言，近年集團於社保、環保相關的開支亦增長不少，但統統都屬於不能「控制」的因素，「控制唔到就要認命……工業係難，呢個係事實，但我對手都難。」
蔡東豪不諱言，過去幾年不少對手被淘汰，精電仍能站得住腳，靠的可能就是「響可以控制嘅範疇做得好啲……做廠就係點點滴滴、一個細水長流嘅生意，呢度掃一啲、果度掃一啲，好似掃餅碎咁。」09年他作出結束於深圳廠房的決定，將所有「雞蛋」搬到河源，結果給他「博」來穩定的員工供應，而他押注做汽車顯示屏，不隨波逐流大搞手機顯示屏，亦給精電換來日本豐田這名客仔，獲得這日企的定單等於一個認同，難怪他對日本市場寄予厚望。
大環境仍差 有信心突圍
精電兩年前決定投資3億元建新廠，產能將提升40%，預期今年初投產，是否代表對生意充滿信心？「歐債危機搞咗兩年，到𠵱家都未解決……冇諗過2013年經濟會突然復甦，美國經濟可能會差添。」蔡東豪琅琅上口，但他仍有信心精電於中、美、日、韓的市場可以跑贏大市，「工業呢個規模其實唔細，又少咗對手……以前大風吹，雞都識飛，𠵱家唔係喇、𠵱家水退，邊個能夠做得出色啲呢？我希望係精電。」
