運輸及房屋局副局長邱誠武（圖）早前大大聲聲話「劏房有存在價值」，惹來各界怒轟。邱武噚日仲唔認衰，死撐當日係引用社會人士嘅言論，係客觀事實，重申劏房有市場需要喎！八方聽聞，邱武近期的確俾「房事」搞到好頭痕，事關租開屋住嘅佢，最近因為業主收樓，而要搵屋搬。
八方係咁意查過吓冊，發現邱武喺大坑浣紗街持有一個單位，但據知呢個單位係放租畀人；佢自己呢？就梗係唔會租劏房啦，而係喺北角半山租屋住。不過最近業主收樓，冇續租畀佢，所以最近都要搬番去天后附近。
如果邱武覺得劏房咁有市場需要，咁有存在價值，唔知佢自己會唔會搵番間靚劏房，住番一年半載，睇吓自己會唔會住住吓，愛上劏房呢？講開搵屋，聽聞前新聞統籌專員何安達最近都由一向住開嘅新界區house，搬咗出九龍塘，方便囝囝返學。