政壇傳聞，兩位環保專家黃錦星、陸恭蕙出任環保局局長及副局長之後，檢討前朝嘅環保政策，發覺焚化爐大有用途，因為即使推行垃圾分類徵費，宣傳教育（以減少浪費及削減廚餘），仍然有近三成垃圾要焚化之，以免垃圾堆填區提早飽和，無法擴展，預料梁振英政府會被逼向立法會重新提出興建焚化爐方案，但時間未定。
如果傳聞屬實，認真搞笑，大家都會記得，去年七月一日梁振英上台之前，三月尾特首選舉之後，當時嘅環保局長邱騰華曾在立法會力推焚化爐方案，要求立法會撥款興建，但俾一啲擁梁派議員單打、諷刺，話焚化爐不合乎梁候任特首嘅政綱喎，另外一啲泛民議員受環保派意見綑綁，一味反對：於是如此這般地，邱騰華被逼收回焚化爐方案，十分無奈。
選舉前，唐梁出席環保界論壇，唐秉承曾蔭權政府意思，支持建立焚化爐，梁就夠晒「醒目」，迎合環保團體意思，話明可以不建焚化爐，於是有報紙話「梁振英大勝」。抵死啦，梁先生依家係特首嘞噃，邱騰華係特首辦公室主任，如果黃錦星、陸恭蕙兩人最後仍要被現實所逼，強推焚化爐，咁樣邱騰華掩住咀笑吖，還是抱事不關己嘅態度？擁梁議員又如何陪同梁特首一同轉軚？
玩政治，有時講說話不要封埋自己後路，因為不在位時說話十分容易，競選贏咗，真係執政嘞，方知政治現實，社會現實，垃圾堆如山積嘅現實，會將執政者逼埋死角，轉唔到身，梁振英之環保政策就是如此，競選時噏得出就噏，未來要為此付出政治代價。
興建焚化爐在外國早已有之，並非恐怖事物，啲環保團體反對，其實理由不足，香港都難搵足夠地段起樓咯，唔起焚化爐仲要在將軍澳搵地皮擴大堆填區？將可焚化之垃圾化為灰燼，在高度關注環保生態嘅澳洲與日本，證實可行，點解香港唔得呀？左丁山支持同時間建立垃圾分類徵費制、建立焚化爐、大力宣傳教育市民減少垃圾，三管齊下，一齊進行。其實邊樣行先都唔緊要，梁振英肯認錯，改為支持興建焚化爐就得嘞！