一支白宮啤酒值成萬蚊港紙！事緣美國一位啤酒粉絲Brad Magerkurth，舊年8月喺艾奧瓦州（Iowa）巧遇為大選拉票嘅總統奧巴馬，大家都係愛啤之人，一拍即合，奧巴馬仲送咗支白宮蜜糖啤畀Brad。
Brad攞住支白宮啤唔捨得飲，最近攞出來拍賣，賣到1200美金（9360港紙），捐咗去明尼蘇達大學兒童醫院。奧巴馬應該冇諗到一支啤酒竟然幫到一班病童。
查實白宮啤都唔係咁獨家，大家都可以自製番支，事關舊年徇眾要求，白宮公開咗白宮啤嘅製法同材料，仲有片睇，雖然其中一種材料係白宮第一蜜蜂嘅蜜糖，普通人家做唔到咁原汁原味，但點都有七、八成相似啩。
講開啤酒，青島啤酒（168）喺白宮都有存貨㗎，自1979年鄧小平訪美後，每逢有中國領導人到訪白宮，佢哋都會攞青島啤出來招呼貴賓。