「300萬爽組合」玩咗兩個禮拜，截至上周五，暫時由錢雋同陳承龍領先，未開波已經話要贏嘅沈振盈成績一般，排尾三，早幾日見到沈大師，佢一副了然於胸嘅樣，揚言一切盡在掌握，唔擔心月尾要出局，仲話排得後係佢嘅策略之一喎。
係人都知沈大師精通術數，佢話，晨早睇通1月屬於波動市，唔啱佢玩，所以一開波買中港交所（388）之後，就轉趨保守，最緊要唔好輸。除咗佢本人，佢睇好周顯同另一位參賽者，指周顯嘅策略同佢好似，至於另一位係邊位，佢怕人哋發力追，唔肯開名。
講到興起，佢竟然批評上屆冠軍，即係《蘋果》、《爽報》老總沙膽虹，話佢唔識玩。大師解釋，今年「爽組合」改遊戲規則，每月淘汰一位參賽者，咁就唔可以睇中一隻股就長揸，再咁玩落去，隨時月尾拜拜，又指沙膽虹揸重瑞房（272）好易出事咁話。