曼聯領隊費格遜最鍾意出口術，好似佢話朗尼啱啱傷好，仲未準備好上陣對利物浦，最快要星期三對韋斯咸場英足盃重賽先復出。但英國記者喺上周五睇曼聯操練，見到朗尼唔止復操，仲生龍活虎，所以今晚見到朗尼都唔奇。朗尼喺上月底膝部受傷，踢完對史雲斯嗰場聯賽後冇再上陣，缺陣咗4場賽事。
「蘇之手」再現26倍
除咗放煙幕，費格遜第2招就係向球證施壓。佢暗示雙紅會嘅球證韋比要睇實阿蘇，「阿蘇充滿爭議性，我唔理佢係咪享受做呢個角色，我只希望曼聯唔好成為下個受害者。」蘇亞雷斯喺上場對曼斯菲嘅英足盃靠手球入波，助利物浦贏2:1晉級。此外，英國博彩公司亦開出唔少有關阿蘇嘅特別彩池，例如佢對曼聯再用手入波就有26倍，插水拎黃牌就有7倍。
謝四打「手」球實慶祝
利物浦隊長謝拉特，喺雙紅會賽前接受英國《鏡報》訪問，佢話如果今場唔覺意用手入波，佢絕對唔會自首，仲會即刻慶祝㖭，「你哋記唔記得以前曼聯對熱刺，熱刺個波明明入咗，但費格遜同門將卡路爾有同球證講真話咩？我𠵱家老實同你講，我（用手入波後）一定會慶祝！」佢仲大讚阿蘇好有級數，勁過奧雲、科拿同費蘭度托利斯。另外，紅軍嘅前總監高莫尼叫大家唔好成日針對蘇亞雷斯，佢唔想外界迫到阿蘇走人。
文仙尼親身練人牆
仲記得上個月曼市打吡，曼城喺補時被尹佩斯射入罰球，人牆排得麻麻哋，個波省中拿斯尼入網，最後主場慘輸2:3。為咗唔想今場對阿仙奴歷史重演，曼城特登喺賽前訓練排人牆。領隊文仙尼親自落場指點占士米拿、迪斯高、查維加西亞同巴利應該點樣企同跳，最後佢仲親自主射罰球，試吓道人牆穩唔穩陣㖭！即管睇吓阿迪達同禾確特射唔射得爆佢哋！