祖國製造業轉活，而上個月出口又大增，旭光高新材料（067）肥仔水。旭光係中投三寶，主打PPS樹脂及芒硝生產，係全球龍頭企業。而主打瓣數又係輕重工業必須原材料。要咁睇，近呢幾個月，祖國PMI指數一路向好，而啱啱公佈無耐，上月祖國出口，就大幅增加14%，好過原先預期5%。數據話俾市場知，祖國製造業轉活，而外國經濟問題紓緩，對祖國產品回復需求動力，旭光已經有運行。再講，旭光主打瓣數PPS，又係食住環保國策，而估計到2015年，包括PPS嘅新材料產業規模，高達2萬億銀人仔，旭光身為領先企業，肥仔水。係咁意估計，旭光本年度純利20億銀人仔，預期PE得4倍幾。當翻半番計到2.78元，PE都係6倍咁大把。
南海石油可短炒
南海石油（076）除咗對上星期，每日成交股數過3億股之外，轉手率奇高，資金瘋狂炒賣。又南油最新NAV 0.36元，但貨幣單位講緊係美元。即係話，集團每股NAV 2.8元，現價（0.122元）折讓高達95%。數係咁計，南油翻一番到0.26元，折讓仲有90%。但呢轉趁勢短打，博升兩成見0.145元，已經有魚有肉。
錢雋