【周日人物】
從祖父至父輩打拼半個世紀，建造一座王氏「電子王國」，但身為長子嫡孫的王賢誌並不樂於守業。他潛心娛樂圈追夢，「離經叛道」13年後，終於回歸祖蔭拓展新生意。當外界以為這位太子爺要幹一番成績，以換取一張繼承祖業的快捷入場券之際，他卻無心接管老父的王氏港建（WKK，532），「生意唔一定要父傳子，個仔可以只係（公司）幕後大部份股份持有人」。
記者：李芳芳
脫掉電視主持的華麗套裝，如今王賢誌的正職是保健品公司三皇集團的董事總經理。新生意由老父王忠桐揸莊的王氏港建打本500萬元開始，五年來已泵水加碼至超過2500萬元。王賢誌在訪問中談到這張商場成績表，坦言與自己演藝路很相似，「要靠慢慢累積，唔係搵緊好多錢，但同樣發揮到自己宣傳營銷嘅長處，開始越來越有滿足感……一年生意額有幾千萬，接近收支平衡，睇住盤數係每日最大嘅壓力。」
告別TVB 進軍中西藥業
成長於優越的家庭環境，王賢誌不再需要經歷上兩代人的苦幹歲月，可以一心沉醉做演員的美夢。王父不但沒有製造嚴加管束的豪門情節，還借助與無綫電視（TVB）前高層趙崇文的老友關係，協助剛大學畢業的兒子進軍電視圈。不過，現實並不眷顧王賢誌的演藝路，雖非玩世不恭，捱過行行企企、出鏡數分鐘的茄喱啡角色，但只能以「talk得」功架躋身電視台二、三線主持。「入行第一個狗年做完，到下一個狗年又係做呢啲咁嘅嘢」，他自覺演藝路去到樽頸位，趁2007年中約滿，他毅然告別這個TVB夢，回歸協助老父拓展中西藥新生意。
面對父親現今擁有每年生意額逾50億元的事業王國，42歲的王賢誌在談話之間，並沒有流露半點雄心壯志，淡然得令人覺得娛樂圈一役，消磨掉他大半的鬥志。「冇話設定目標第幾年要做到幾多生意額，或者幾時要上市，講到咁遠有啲虛無飄渺。好難同爹哋比較，目標唔應該定得太高……𠵱家只會步步為營，做啲嘢有口碑同為人讚賞，咁成件事已經好有滿足感，賺到錢只係額外獎賞，衡量成功有好多嘢，冇迫切性要好快掘到一桶金。」
愛試新嘢 「仲有空間轉」
年屆七旬的王忠桐深知兒子個性，雖然接棒決定未迫切到要推上日程表，但早漏口風可能傳給外姓女婿張瑞燊，甚至其他專業人士管理。王賢誌亦不着緊祖業的管理大權或將旁落他人，「我都覺得我唔係WKK嘅接班人，唔係太有興趣做儀器代理、零件製造嗰個範疇；又驚一做會唔會差過佢好多呢，我信心唔大囉，可見嘅將來都冇可能去做呢樣嘢。但做好新嘅三皇唔同，冇人做過，冇得比較，唔可以話我做得差。但never say never，正如十幾年前我好熱烈做電視咁，都冇諗過有日會離開TVB，話唔定三五七年後會覺得又要再轉，我仲有空間吖。」
當上一輩老牌港商近年紛紛落實移交產業至下一代，為避免爭產鬧劇而傷透腦筋時，王氏家族第三代沒有硬性跟傳統接手家族產業的新派觀念，確實不常見於華人世界。但不代表這會打不破「富不過三代」的詛咒，即使子孫不繼承衣缽，王賢誌的已故爺爺王華湘及父親早已將股權注入信託基金，為受益人的第三代可續享祖業的甘甜。
