一個月時間，足以改變任何事情。股市由審慎轉為樂觀，散戶又齊齊中「冧巴」降，自誇今日賺幾多。去年底龜縮的大行及基金公司，今年初後排隊吹雞唱好，滙豐話步入牛市，今年回報將是10年最佳。最賺錢投行高盛亦將恒指目標價，調高至27500點行內最牛。最恐怖是，自認冒牌股神的四叔李兆基，忍了近四年後，再一度益街坊畀目標，估港股今年睇28000。
霎時間，全城牛氣沖天，唔怕揸得多，最怕倉冇貨。這種亢奮心態，似足牛三，但實情是否如此理想呢？每年大行例牌參加「恒指競猜遊戲」，年年錯，卻又年年估。股榮統計過去七年10間主要歐、美及中資證券行「貼市」目標，諷刺地，只有去年2012年最準最貼近，其餘六年，年終目標與大行平均預測相距好遠。
數據發現，大行貼恒指，無論市好市壞，目標價一定高過上一年度年終收市價，平均潛在升幅大約15%。至於最樂觀的大行，預測更有26%上升空間，即使如07年大牛市，港股衝上30000點樓上，但末季急插至28000點報收，大行仍然「死牛不改」，一廂情願以為08年牛市延續，未有發出轉勢訊號，最終滿地碎眼鏡。
同樣經驗發生在2011年，無論美資、歐資或中資大行無一睇淡，最後恒指跌兩成或4000餘點，大行預測離譜，方向更錯晒。
大行叫瞓身買貨 有危機
反觀，如果大行淆底，目標價不敢定得太高，該年港股反而有運行。06及07年大行對港股審慎，給予最高目標的瑞銀，估年度回報最多兩成，最終恒指連續兩年有超過三成回報。08年海嘯後，大行09年初都非常保守，甚至有美資行估大市有機會跌至10000點樓下，最終造就當年恒指勁升52%。
去年亦有類似情況，大行年初擔心歐債危機，中資券商估港股最悲可能跌至15000點，最後恒指無驚無險升4000多點。
股榮現時最擔心的，是市場一面倒睇好港股，沒有任何一家大行及券商，作出溫馨提示，這種打鑼打鼓叫人瞓身買貨的聲音，其實更危險。倘以大行目標大幅偏離年底點數經驗，今年港股會chok到飛起，一係升到你唔信，另一種是反高潮下跌。
我知道此時此刻潑人冷水，肯定不受歡迎，但預測是靜態，投資卻是動態。要估一隻股份年尾目標已經很難，更何況是50隻股票。買波嘅朋友聽過，「想要生活好，咪買利物浦」，套用喺股市「想要港股好，唔該咪唱好」。現時港股㷫烚烚，與其湊熱鬧，不如暫時離開，冷靜一下為妙。
股榮