昨晚發了一個夢，夢到美斯在玩射九宮格的遊戲。
「今次派你去西班牙，唔係訪問美斯，而係同佢玩遊戲。」聽到台長咁講，我放心不少，皆因若果齋傾偈的話，恐怕好難先開到怕醜仔的金口。
「好到極，之不過呢隻喺日本發揚光大嘅射九宮格，對美斯嚟講會唔會太過兒戲呢？會唔會打機先啱佢心水呢？老細。」我真係好怕比呢位豆丁笑我幼稚。
「痴線，咩兒戲呀，你估好易呀，上次搵阿施丹玩，佢先射得個4球！碧咸仲離譜，七旋斬喎，比晒機會佢先射得個3球！」吓，咁屎？上次山度士一腳都踢跌3個冧吧啦。
轉眼已經去到魯營球場，眼尾望到美斯佬笑笑口行埋嚟，「多謝你哋邀請我哋玩game喎！」乜咁客氣又識講嘢，令我瞬間溶化。「美斯仔，你細細個我就話你掂啦……」「Sorry，我係佢大佬，美斯響果邊拉緊筋！」係喎，成個宅男唔笑嗰個先係美斯，佢望住我冇表情，但一見到龍門口個九宮格就戚起條眉：「正呀！」
見到美斯仔雙眼發光，埋位射門，我慌忙走埋去擺個主持款交吓戲先，「美斯，響你挑戰之前，不如等我同你講吓之前嘅紀錄先啦！」「唏，都唔使講啦，我不嬲唔理人，志在挑戰下自己啫。」「咁……」「唔使咁啦，等我一口氣射晒佢啦！」說時遲腳步快，美斯起腳啦：「5號！」嗰頭講完，5號牌應聲入網，之後7號、2號、1號連續倒下，「3號吖！」我其實好少聽到美斯把聲，咁大聲嗌出來就更未試過。「哎呀！」場邊球迷反應仲大，原來佢難得射失咗。「係咪玩完呀？」美斯仔一面失望，「啊唔係，其實每人都有3次機會再射。」
結果又射失咗1球，美斯已射咗8個號碼，剩番正中間下路嘅9號牌。「仲有1次機會呀！美斯。」我提醒佢，「係！」為咗等佢唞一唞，我乘機補充「之前最勁係薛高，射中6個，其實你已經破晒紀錄！」「好！」美斯輕鬆晒一腳射埋去，結果……我醒咗！
我有得遊埠係假嘅，美斯響元旦上日本電視台射九宮格係真嘅，最後中唔中呢，你自己搵嚟睇啦。
now TV主持
mailto:[email protected]