【生活篇】
王賢誌一直沒有掩飾自己各方面得到父蔭支持，但「有錢仔」的標籤，卻令他受到社會歧視富人的折磨。他自言生活不算奢華，從來不玩名車、貴音響，最大開支只是旅遊和嘆美食。
「一個大學畢業生頭三年嘅工資最多得6000蚊，我TVB份人工咁奀，有爹哋接濟，先唔使供屋、養車，否則死鬼咗啦！」王賢誌上年因家中關係做到東華三院總理，名下先後擁有的兩匹名馬亦與王父共同飼養。但他認為自己不能被定義為豪門，「屋企唔算係好有錢，中上啦，由細到大住九龍區，細細個有司機，有私家車坐，但從來都冇保鑣、冇私人飛機。」
他以往很介意被標籤為有錢仔，「實在好多人係憎人富貴厭人窮，標籤咗呢樣嘢影響我工作囉，喺電視台想要機會，但人哋會覺得我唔恨做玩玩吓，其實係一個歧視嚟㗎嘛，但又冇辦法去改變人哋觀感。好似我唔鍾意電視台幫我安排衫褲咁，就話我少爺脾氣，但自己先最清楚點着好睇。」
最大使費 旅行食好嘢
姿整的王賢誌回想以前做藝人的最大支出是買衫，亦是家中最貴嘅財產，超過兩萬元一套的Dolce & Gabbana、Jean Paul等一線大牌套裝多達廿套。「但唔會畀幾十萬買隻錶囉，我又唔玩車，啲車全部係屋企嘅，大家任揸，但冇一架跑車，爹哋都係坐七人車。」
他說，「𠵱家最使錢嘅係去旅行同埋食，會使六位數㗎。難得去到，我一定會住好靚嘅酒店同埋食得好啲，搵吓旅遊書介紹嘅米芝蓮餐廳，最近就去英國食咗一餐人生最貴嘅午餐，成3000蚊兼食成四個鐘，係好好回憶。但我唔係好勁咋，有啲唔係藝人嘅朋友同家人去個普通旅行，阿媽會帶埋化妝髮型師去㗎。」