【本報訊】今時今日，相機要輕便易用才有市場。八十後年輕藝術家蕭子文（Eric），設計一部外形笨重的「人肉相機」Touchy，需兩人合力才可拍攝，設計獲日本東京大學賞識，將之研發成實物。Eric計劃將Touchy用在社交治療，協助隱蔽青年及長者與人溝通。
記者：盧勁業
「人肉相機」Touchy像個裝了雙大眼睛的頭盔，需拍攝者和拍攝對象有「肌膚之親」才可拍照。拍攝原理是透過可接通微弱電流的感應球，雙方握手即通電拍照。
Eric表示，計劃意念來自對現代人疏離關係的反思，「人人都用電腦、手機溝通，面對面嘅接觸越嚟越少，facebook嘅friend list有好多朋友，但真正見面嘅唔多。我想開發一件物品，鼓勵人同人之間『離線溝通』嘅機會」。
剛完成日本東京大學駐校藝術家合約，現在當地一家廣告公司任創意總監的Eric坦言，Touchy是數年前的概念。一次機緣巧合，在愛爾蘭認識一位東京大學教授，獲邀到該校工作，協助電子工程系進行媒體科技研究，Touchy成為其中一個研究項目。
互動幫助重拾自信
過去兩年，Eric在日本及內地多個城市示範，「藝術應該走入人群互動」。日前他在香港街頭測試，「日本人見到會好奇走埋嚟問呢舊喺乜，之後試玩，佢哋體驗咗個過程就會好開心；中國人好實際，第一句就問使唔使錢，然後問係乜原理、邊度有得買」。至於港人，Eric笑說：「走夾唔唞，以為你想做傳銷，定喺佢哋身上拎乜嘢着數。」
Eric近日物色生產商大量生產Touchy，「日本有唔少隱蔽青年，完全拒絕同外界接觸，仲有長者因年老覺得自己冇用，同社會疏離。之前去老人院，長者戴咗之後幫人影到相，呢種互動幫佢哋重拾自信」。
