政府山成功保留，由一班專業人士組成嘅政府山關注組，噚晚舉行慶功宴，除咗羅雅寧、黎廣德呢啲功臣外，仲嚟咗一位神秘嘉賓──就係啱啱卸任古諮會主席嘅陳智思。八方好記得陳智思做主席嗰陣，唔理民意投票將政府山貶做二級歷史建築，幾乎令港人嘅集體回憶消失，結果群情洶湧，佢一度引咎辭職，最後改口約滿離任。估唔到噚晚畀面去慶功。
作為「梁粉」嘅陳智思去到對家慶功宴，輸人唔輸陣，仲非常寸嘴㖭，猛彈政府山關注組呢幾年發動嘅保育運動向政府施壓，壓力唔夠狠咁話喎，又話關注組成員都唔算好難應付啫，對佢嚟講濕濕碎啦。但佢講完一輪飯都冇食就走咗喇。
八方估佢都係講笑搞吓氣氛，梗係啦，保育議題隨時係政治炸彈，𠵱家佢甩難唔使再理，自然講得輕鬆，下家林筱魯，未必咁諗囉。
關注組成員仲話遲啲會搞個保育論壇招呼吓林筱魯㖭。