近年好喜歡睇印度做背景嘅電影，《作死不離3兄弟》後，最好嘅係去年《黃金花大酒店》，有評論認為若果令人齒冷嘅「印度輪姦案」早一個月前發生，《少年Pi的奇幻漂流》唔會喺各地咁收得，小弟亦會罷睇。發行電影要收得講時機；評論球賽勝負亦然，「天鵝」史雲斯勁勢路人皆見，不過征戰頻繁，今晚遇上「天敵」愛華頓，係時候斷纜！
同事守丹發現，體育版近期做嘅足球話題主題球隊或人物多數中伏，今天本報焦點人物係來自愛華頓嘅紅爆左閘巴尼斯，佢心水清話球迷們，一定識走位，捧史雲斯[+1]；執筆之時未知呢位喺擂台長期水準高企嘅名家會唔會口是心非，今日重押天鵝，撇除「話題宿命」呢種楊天命算到自己真係被尋仇，預定滅火筒救火嘅「精準」分析，今天「天鵝」單計體力已難擋實力強橫嘅愛華頓進襲，拖肥試闖英超三甲良機至。
史雲斯上月頭作客打敗阿仙奴譽滿欄邊；到上周足總盃交手，兵工廠恨盃恨到發燒，下半場藉對手體力大降反勝以為復仇在望，結果又被對手追和。呢隻天鵝好似唔識停，周中作客擊倒更強嘅車仔，戰情一樣係少射門但極準，被圍攻門將撲救次數各錄得12次同11次；常以弱勝強，今屆中型班典範！
不過係咁踢，領隊勞特立嘅輪換制用到盡。鬥阿仙奴下半場中段焗換入柏保路靴南迪斯同米捷兩大領隊愛將仍處劣勢；鬥車仔更晒冷幾乎主力盡出（正選只收起門將禾姆同翼鋒尼敦戴亞），隔3天今夜又作客愛華頓，然後下周中又喺足總盃重賽鬥阿仙奴，好盃嘅勞帥會點部署？
對手愛華頓喺費蘭尼仍未被撬走下，捧場客要珍惜押注機會，唔同史雲斯鍊跑「車」；周一鬥英乙車頓咸，強陣當熱身贏五個一皮，體力充沛亦必定更看重聯賽爭入前4踢下屆歐聯。計數據，從來係天鵝嘅天敵，英超交手3戰全勝未失1球；今場必加強中場掃蕩唔會畀好搓嘅史雲斯帶住嚟踢，莊家㩒低主W得1.49倍，可兼捧「讓和」。
再選，早場取老列納帶領嘅昆士柏流浪擋得住棄用佢嘅舊主、天敵熱刺，早講過莊家精選讓半／一盤，長押上盤難有運行；近期呢個攤路更大旺，剛過去的周日曼聯，周三維拉，周四祖記上盤全炒。
昆士柏近期默默掃走瘀血添新兵，勢谷底回起，加上明知領隊復仇心切，必戰意如虹！
文：蘋果波神
（下次見報日期：16/01）