問世間情是何物，直教生死相許？雖然政壇元秋蔣麗芸，未致於捨命瞓身撐大話英，但佢用咗好多老公都唔記得結婚紀念日為例，查實都同政治自殺冇分別，乜有選民鍾意咁儍咁黐筋（記住，唔係天真！）嘅議員嘅咩？有網民發現，元秋同狼英原來喺90年已經「情根早種」，元秋至今對狼英仲咁死心塌地，係咪有啲癡心錯付呀？
力撐愛狼冇割雙眼皮
情若真，不必相見恨晚。有網民發現，原來元秋90年，曾經同狼振英一齊喺港台節目《亞洲經驗》做主持，講台灣經驗。斷定當時斯斯文文、陰聲細氣嘅元秋，有可能已經暗戀狼英，因為自爆40歲先結婚嘅元秋，當時應該仲係單身㗎，怪唔得23年後再重逢，依然死心塌地；得唔到嘅、永遠係最好㗎嘛。
元秋原來對呢段「那些年，我們一起主持的節目」刻骨銘深，噚日喺立法會同記者一齊睇番舊片段時，即時噏得出節目名之餘、仲記得年份先至好嘢；睇睇吓，佢仲力撐愛狼應該冇割過雙眼皮，只係年紀大而「墮皮」啫。
有記者問佢，係咪鍾意狼英呀，否則做乜搏命撐？元秋即時話呀，如果咁都叫鍾意，上次得佢首度以獅吼功力撐嘅吳得掂，唔通又係佢暗戀對象？
唔少網民話狼英同元秋都好登對吖，可惜𠵱家各有另一半，唔可以展開一場轟轟烈烈嘅戀愛；但相信佢哋之間呢份世人難以明白嘅「愛」，情義兩心堅，一定會繼續發展。
mailto:[email protected]
齊心一意，打救行騙長官梁振英
http://www.tomonews.net/game/bslapcy/web/