足總今日就會公佈喺大球場上演嘅「蛇年賀歲盃」詳情；據講今次會請泰超嘅蒙通聯、新季升中超嘅上海特萊士，同埋韓職中游球隊釜山偶像同港聯爭盃。可能足總都覺戲碼唔夠吸引，今年實行賣大包吸客；據聞單日票價唔會超過200蚊，買晒兩日仲有9折，即係360蚊睇4場波，希望可以吸引到睇開賀歲波嘅球迷趁吓熱鬧啦。
羅傑承縮沙 足總硬接手
今屆賀歲盃一如慣例，喺大年初一（2月10日）同初四（2月13日）舉行，原本比賽由南華同傑志去搞，點知南華足主羅傑承計唔掂數打退堂鼓，足總為咗唔想球迷新年去大球場睇波嘅傳統斷纜，喺最後關頭接手。
由於比較遲籌備，就算搵鄰近亞洲球會嚟賀歲亦唔容易，據講幾經辛苦，先搵到泰超嘅蒙通聯、新季升中超嘅上海特萊士，連同韓職中游球隊釜山偶像訪港。戲碼係就係唔夠勁，但話時話，PSY紅遍全球，而早前韓國男子組合BigBang訪港又掀起熱潮，話唔定今次釜山偶像，都可以吸引在港嘅南韓僑民入場；有埋索韓妹打氣，球迷睇波就更開心啦。
過往賀歲盃，可以話喺本地球壇每年一度嘅盛事，過去幾十年嚟過賀歲嘅球會同國家隊，可以話數之不盡；除咗賓菲加、士砵亭、阿士東維拉同柏迪遜等老牌球會外，國家隊就有巴西、瑞典、南斯拉夫、哥倫比亞、墨西哥、克羅地亞同丹麥，當然仲有亞洲嘅日本、南韓同伊朗等。
至於喺呢個賽事獻過技嘅球星，就更加不能盡錄，因為實在太多！我求大俠隨便數都有史杜高域、高華斯域、米路斯域、三浦知良、達連、史岱捷高夫、靴南迪斯、朗拿甸奴同羅賓奴；當中部份球星更喺呢個賽事成名，繼而成為國家隊主力，所以賀歲盃係好多本地球迷嘅集體回憶。
上屆埋單兩萬球迷捧場
不過，隨住贊助多年嘅啤酒商，喺06年後唔再贊助，賽事亦由國家隊降格到球會賽。足總試過自己搞，結果蝕到入肉，近幾屆外判畀由球會做主辦，當然難同當年比較；好似上屆南華搵城南一和、清水心跳同廣州富力，兩日夾埋先得兩萬球迷入場，唔少球迷仲話搞成咁，不如唔好搞啦。求大俠同好多球迷都一樣，只希望賀歲盃可以搞番好啲，等球迷新正頭開開心心睇波。