中大慶祝五十周年校慶舉行「書海驪珠：香港中文大學圖書館珍藏展」，展出大約120種珍藏，年代跨度3,500年，由商代嘅甲骨、古籍善本、書畫拓本、名人信札手稿以至20世紀書刊等等，都係免費入場任睇㗎，展期由今日起到5月19日喺中大文物館展出，唔睇就走寶喇。
甲骨收藏最豐富
珍藏展噚日開幕，八方先睹為快；現場所見展出商代56片甲骨，包括龜甲卜辭33片、獸骨卜辭12片及殘骨11片，係全港最豐富嘅甲骨收藏，同時又有逾50種清代至當代名家書畫、手稿及信函，作者有康有為、周作人、錢穆 、錢鍾書同朱光潛等，份量十足。
另一焦點展品《書影》，係杭州文瀾閣《四庫全書》嘅原寫本，作者周亮工因另一本著作觸犯朝廷忌諱，乾隆下令將佢所有著作燒毀，呢本點解可以倖存？至今都係未解之謎嚟㗎。
