儼如影子特首嘅政務司司長林鄭月娥，聽日又要代表香港出訪嘞。今次佢雖然只係去到一河之隔嘅深圳，同深圳市市長許勤共同主持深港合作會議，兼禮節性拜訪深圳市委書記王榮，但訪問團規模卻好鼎盛，除咗政制及內地事務局局長譚志源、以及政制及內地事務局、環境局、發展局同勞工及福利局四局常秘、仲有幾位副局長，包括上任後首度出訪嘅政制及內地事務局副局長劉江華。
但最令人驚奇嘅，竟然係有中央政策組首席顧問邵善波。有政界中人話，以前罕見佳叔跟住政府官員訪問，邵善波今次隨行，唔通係驚盛傳隨時替補狼英嘅林鄭有乜異動，所以黐到實一實，以便即時向狼英滙報？
有人笑笑口話呀，每屆特首都會有支針幫自己收風，董建華有路祥安，煲呔就有大班做「煲呔針」，邵善波好明顯係「CY針」啦。唔知邊個收料出色啲？