男人經常話女人大使，的確，菲菲有時被Shopping小妖纏身，乜理智都唔記得晒。不過男人何嘗唔係一樣，「玩具」唔貴唔玩，電子產品、相機、手錶、車……全部都堅貴！一對情侶想成功落實儲錢大計準備結婚，秘訣係要對自己夠「狠」，一出糧將啲錢過哂入一個「有入冇出」嘅聯名戶口，確保大家儲咗錢先，其餘錢你想點使，又或是想儲私己，由得你。
不過，招行（3968）最近喺內地推出一個「保底歸集」嘅辣Plan，每月於A戶口設定一個保底金額，就當係1000蚊啦，咁銀行會每日Check住入面有幾錢，只要戶口有多過1000蚊，所有超出部份，就會自動轉去同行或跨行嘅B戶口。
如果情侶咁玩，變相連私己都冇得儲，儲錢效率相信可大大提高。不過，菲菲覺得結咗婚之後，就要用另一個玩法，學招行宣傳單張建議咁，就係每個月男方一出糧，扣剩「保底」金額作為零用後，全數撥去女方度。殘忍？唔使畀家用呀？
Fifi
本欄逢周二、四刊出