【本報訊】赤柱監獄昨舉行學業證書頒授儀式，鼓勵82位在囚人士考取各類學業及公開試證書。49歲阿旭（化名）被判終身監禁後，獲得多項證書，更修讀神學學位逾12年，最快明年畢業，惟老父在年多前去世，八旬母親不良於行未能出席儀式，仍透過影片鼓勵兒子，「我想你返嚟陪我，所以你要繼續努力，唔好放棄，阿媽等你返嚟。」
記者：潘柏林
阿旭29歲因謀殺罪成被判終身監禁，至今仍懊悔莫及，「我要同死者屋企人道歉，我坐幾耐監都補償唔到。」眨眼間鐵窗生涯已廿載，他在2000年開始重拾書本攻讀浸信會的遙距神學學士課程，每日溫習和做功課逾5小時，最快明年畢業，但老父在年多前離世，未能看到兒子改過自新，戴上四方帽一刻。
阿旭昨代表逾80位在囚學員致謝辭，表示最難忘父親的警世真言，「佢問我知唔知聽日會係點？嗰時我真係唔識答佢，原來佢話我聽，我今日所做嘅事真係影響聽日嘅嘢，𠵱家學識凡事要三思而後行。」
「阿媽等你返嚟」
不良於行的母親昨以影片鼓勵兒子，「你好努力改變自己，阿媽係知道嘅，阿旭，阿媽八十幾歲啦，都唔知仲有幾多日子，唔知等唔等到你返嚟，我想你返嚟陪我，所以你要繼續努力，唔好放棄，阿媽等你返嚟。」
阿旭看畢影片後流下男兒淚。他坦言母親從未放棄自己，「記得嗰時喺荔枝角拘留所，8號風球啱啱掛，阿媽堅持第一個嚟探我，嗰15分鐘我好珍惜，佢冇埋怨過我任何嘢，就算我判咗嚟赤柱，佢都堅持每個月嚟，直至佢行唔到。」
須獲得特首批准
如今阿旭希望竭力改過自新，未來幾年可獲批提早出獄，陪伴母親走完人生最後一段路。
懲教主任蘇建國表示，終身監禁犯人需通過長期監禁刑罰覆核委員會的刑期覆核，再得行政長官批准方可提早出獄。犯人一般需要監禁逾20年，長時間行為良好、不斷進步，修讀學位亦是考慮因素之一。