喺地少人多嘅香港地，地產商起樓點樣地盡其利、物盡其用真係頴爆頭。不過香港人靈活變通，香港嘅商人良心澎湃，總會諗到方法幫助無數一世為物業打工嘅樓奴嘅。好似最近加推嘅長實長沙灣樓盤「一號．西九龍」，網民發現，當中一啲單位，窗台仲差唔多大過廚房，簡直係曠世奇「則」。
高登網民噚日熱烈討論呢個一流筍盤，焦點係一個1,160平方呎嘅三房兩廳單位。圖則顯示，單位廚房嘅空間，撇除煮食爐、雪櫃、洗衣機同洗碗盆等設備佔用嘅面積，居然同客廳窗台差不多。建築師真係匠心獨運，充份了解到現代城市人越來越少喺屋企煮食，起大廚房不如起大窗台。
廚房僅比客廳窗台闊100毫米
圖則顯示，廚房活動空間嘅闊度三呎都唔夠，僅僅比客廳窗台闊100毫米咁大把。網民形容呢個係「神則」，仲憧憬他朝一旦入主一號．西九龍，可以咁樣向親朋戚友炫耀：「第時親朋好友上來又可以威?——你哋睇吓，個窗台大到同廚房差唔多，大家咁耐無見，快啲排隊入廚房攞杯嘢飲，企上窗台傾吓計啦，企高啲傾得free啲。」
呢啲咪李嘉誠愛香港嘅見證囉，佢成日話想國家同香港好，希望香港人安居樂業。大家想像一下，當一位好丈夫結束朝八晚九嘅工作返到屋企，老婆喺廚房整緊晚餐，老公走入廚房見?老婆時，大家發現個廚房窄到要兩個人攬埋一嚿，你話幾浪漫呢？