自從民企風暴之後，投資者對於嗰啲名不經傳、聲稱自己係七、八線城市好賣得嘅品牌，已經避之則吉。所以全國都見到蹤影嘅康師傅（322）、旺旺（151）就變得矜貴，市盈率只要一低過25倍，就有券商出嚟話抵，完全都係因為揀無可揀。原本蒙牛（2319）算係一隻可塑性甚高的品牌，只可惜發展到一定規模後，管理變得異常鬆散，問題奶事件接二連三，再咁落去真係唔使搞。
聽分析員講，自從中糧舊年派新總裁落去接管蒙牛之後，公司內部大震盪，有員工私下形容自己係「被迫從糧」，勁懷念牛根生的日子。野村噚日就話，蒙牛啱啱12月底同分銷商開大會，講明要重整銷售渠道，今年加50萬個銷售點（加幅約30%），請多5000人；但公司竟然話銷售開支比重可以不升反跌。
咁錢從何來呢？新總裁話以前資源分配唔平均，調番啱個比例，就已經補番條數！可想而知蒙牛嘅「肥膏」有幾多。
至於食品安全，蒙牛話請咗可口可樂前管理層做新QC阿頭，全面改組部門，今次實搞得掂咁話。蒙牛已經令投資者失望過好多次，𠵱家一鋪都唔可以再錯。
海迪