恭喜晒！證監會主席唐家成榮升外公，佢位千金舊年年尾生咗個女，聽聞出世有8磅重，肥妹仔一名，仲係混血兒，可愛到不得了，難怪唐家成一講到個寶貝孫女就笑到雙眼咪成一線。
孫女混三國血統
唐家成太太係英國人，囡囡嫁咗位外表似歐洲人嘅黎巴嫩人，寶貝孫女就有一半黎巴嫩血統，四分一中國同四分一英國血統，長大之後一定好靚女。孫女英文名Sophia，源自希臘，有智慧嘅意思。
家陣一講BB，好快就會講到教育問題，好多家長喺BB未出世就攞定入學申請表，唐家成係英基主席，仔女本身又喺英基讀書，照計孫女過幾年要入英基應該冇難度。
不過呢樣都係遲啲嘅事，唐家成𠵱家要諗掂點樣同政府傾改變資助模式，同埋請番個英基行政總裁，接替今年8月退休嘅杜茵妮。
李華華