本地券商股噚日再熱炒，普遍升逾一成，早兩日推介嘅金利豐（1031）衝高3%後平收，似係有心人壓價，唔排除有後着，可坐多一陣。
美國樓市復蘇勢頭強勁，傢俬股順誠（531）九成產品出口美國，盈利隨時幾何級數上升。大利市機顯示，順誠歷史市盈率320倍，貴得驚人，但睇真啲，公司去年上半年盈利達4411萬銀，為2011年度全年嘅3.2倍，明顯已走出谷底。彭博綜合券商預測今年市盈率僅16倍，雖稍高於同業敏華（1999）的12倍，但順誠PB 0.9倍，敏華2倍，順誠折讓達55%，配合盈利急彈，上升空間更大。順誠手頭淨現金2.1億銀，財務狀況穩健，中期息4仙，年度化息率逾6厘，屬財息兼收之選。
順誠經過多日調整，噚日再炒高3.2%報1.28元，收復10日線，成交大增，唔排除聰明錢已睇中秀麗前景，現價買入，目標先睇1.60元，潛在升幅25%，屆時仍較2011年高位平一成半。
唐牛