曼城因老細係阿布扎比集團而家財億萬，可憐佢哋嘅粉絲就褲穿窿。曼城喺下個禮拜日訪阿仙奴場英超大戰，原本分到3,000張門票，點知因太貴而滯銷，仲搞到有912張要畀番阿仙奴。咁又係，張波飛連搭車同食嘢，每個人要使千六蚊港紙，你話曼城粉絲點可能唔呻貴吖！
曼聯亦專劏對家fans
咪以為大球會嘅粉絲就一定腰纏萬貫。好似曼城咁，佢哋有好多粉絲因負擔唔起啲費用，結果唔可以喺下星期日去阿聯酋球場幫球隊打氣。曼城球迷會秘書長奇雲柏加就話：「啲波飛要成62鎊（約772港元）一張。我成世人都未買過啲咁貴嘅波飛。如果曼城粉絲選擇坐球隊嘅巴士落倫敦，每人就要畀30鎊車費，加埋張波飛就要成92鎊。如果連埋場刊同飲飲食食，每人隨時要使125至130鎊。呢個數字反映咗𠵱家睇波，經已脫離現實，唔係人人負擔得起。」
查實曼城嘅鄰會曼聯亦係咁，斬到對手球迷一頸血。下周三韋斯咸會喺英足盃第3圈重賽作客奧脫福，啲波飛要成45鎊一張；而之前韋斯咸喺主場對曼聯，賣畀紅魔粉絲嘅波飛都係20鎊一張，你話曼聯係咪好離譜呀！
講開曼城，佢哋嘅西班牙中場大衛施華喺禮拜二滿27歲；而佢喺Twitter度話畀粉絲聽自己同家人慶祝生日，仲貼咗張吹生日蛋糕蠟燭相出嚟。下星期日作客阿仙奴，曼城經已冇托尼兄弟同埋拿斯尼，而且仲要得2,000多位粉絲嚟倫敦打氣，睇嚟佢哋要靠壽星仔大衛施華嚟帶旺球隊至得嘞。另外，AC米蘭老細貝盧斯科尼公開鬧巴洛迪利係「爛蘋果」，唔會簽佢；睇嚟巴神短期之內都會繼續留效。