曼聯喺嚟緊個禮拜日，會喺主場奧脫福同利物浦合演英超雙紅會；雖則未開波，但啲人已秤先曼聯。點解？除咗係因為曼聯弗啲同表現好啲，仲因為呢場波係由被指曾偏幫曼聯嘅韋比嚟執法囉。
現年41歲、被認為英格蘭首席球證嘅韋比，03年開始喺英超執法，兼且仲喺2010年創造歷史，成為首位吹歐聯決賽同埋世界盃決賽嘅球證；而佢來頭咁勁，加上大賽經驗豐富，由佢嚟吹英超啲大波，絕對係合情合理。但問題係，喺兩年前曼聯主場贏利物浦1:0場英足盃第3圈，佢一開波就睇唔到貝碧托夫插水，無啦啦吹罰利物浦12碼（操刀嘅傑斯一射入網）；之後仲喺32分鐘將攞波唔係攞腳嘅謝拉特，直接用紅牌趕出場。
佢呢兩個爭議判決，間接令利物浦輸0:1出局；當時效力利物浦嘅賴恩巴布事後深心不忿，仲惡搞韋比，將佢個頭key落曼聯波衫，仲post咗喺Twitter度，結果俾英足總罰咗1千鎊（約1萬2千港元）。
被批常偏幫曼聯
其實唔單止呢單，曼聯09年喺主場對熱刺，後者門將靴里奴高斯明明冇犯規，但韋比又判錯仲吹罰12碼，間接幫原本落後0:2嘅曼聯（C朗射入12碼後追成1:2），最終更戲劇性反勝5:2完場。英國方面仲幫韋比做咗個統計，唔計今季，佢由04/05球季起總共吹咗曼聯32場比賽，仲畀咗9個12碼佢哋，但判罰佢哋嘅12碼數目，就淨係得兩個咁大把，可見佢係幾咁「旺」曼聯。
英國傳媒亦話，利記嗰邊知道係韋比吹佢哋對曼聯場大戰後，啲球迷非常不滿，希望賽會可以換人。講真，韋比個底花成咁，難怪利物浦球迷會諗衰佢。事實上，曼城喺上季季尾作客紐卡素場關鍵大戰，都係韋比負責執法；而曼城球迷對賽會有咁嘅決定十分憤怒，好彩曼城爭氣，贏2:0而回。最衰馬會嘅先發事件係買人而唔係買隊，若果先發有開曼聯兼且又有入12碼呢一項，我求大俠一定瞓身支持。
