街邊報紙檔日漸式微，旺角彌敦道倫敦大酒樓對出嘅報販，最近就諗到出位新招，將報檔改造成一座高9呎嘅玻璃屋！雖然未完工，但已引起途人側目，擔心阻街兼唔安全。食物環境衞生署就話間玻璃屋「過界」，已警告持牌人。
令彌敦道迫上加迫
呢間玻璃屋約2.5呎闊、5呎長，雖然佔用面積同老式報紙檔差唔多，但由於玻璃屋係密封式設計，而且高9呎，因此頗具壓迫感，唔少人行過都保持距離，令原本迫爆嘅彌敦道行人路迫上加迫。不過，自稱係該報檔老闆朋友嘅裝修師傅就話，係爽仔睇唔慣至覺得迫喎。
裝修師傅話，間玻璃屋符合安全標準同法例要求，牌照准許報檔高2.5米，佢只係同各大發展商一樣，用盡空間。佢強調間玻璃屋冇打地基，否則就係違法建築。咁打10號風球會唔會吹冧㗎？師傅話採用強化玻璃非常硬淨，報檔老闆亦有購買第三者保險，「總之唔使擔心，食環署、地政署同屋宇署都嚟睇過，冇人話有問題」。
裝電視播廣告搵銀
不過，食環署發言人就話，初步睇間玻璃屋超過獲准許面積，已經警告持牌人。至於玻璃屋設計亦未得署方批准，會跟進調查。有同區報販就指該報檔變身玻璃屋，其實係為咗賺取廣告收益。事實上，玻璃屋面對行人路一邊已經裝咗大電視，估計係用嚟播放廣告。
近年報販經常呻生意難做，雖然牌費每年只係大約4,000多元，但賣報紙雜誌、煙仔收入有限。全港報販大聯盟主席廖社青話，業界一直爭取政府放寬可販賣物品同廣告限制，但覺得改建玻璃屋太誇張，質疑安唔安全，亦唔贊成行家偏重廣告收入。
街坊有嘢講
《唔會幫襯》
黃小姐：間玻璃屋密封，冇得揭下雜誌至買，我諗我唔會幫襯。
《感覺古怪》
楊先生：阻街就唔覺得，但感覺幾古怪，賣廣告可能啱啲，賣報紙就唔方便。
