有最貴茶餐廳之稱嘅翠華（1314）舊年11月底成功上市，至今短短個幾月，據聞已經加開多咗四間分店，即係平均一個多星期就開一間，似乎上市之後跑數力度仲有增無減。咁辛苦，咁員工今年有冇人工加先？
過年加價3%
翠華總經理李楸夏（Jessica）同華華講，𠵱家公司有兩個方案畀員工揀緊：（一）減工時，但就唔加人工；（二）工時不變，但就有人工加。聽落都幾難揀吓喎，要獎金定獎品？一般打工仔可能擔心工時邊有咁易減，梗係揀現兜兜啦！但若果更數分配合理，可能有員工鍾意返少啲。
今次公司都算幾民主，Jessica話𠵱家由全體員工投票，傾緊會用邊個方案，至於加薪方案嘅加幅就未定，要遲啲先有結果。咁快就要諗定減工時，唔通翠華想為將來政府有機會推最低工時做定準備？
Jessica話，翠華今年會派700萬獎金畀全體1500名員工，金額較舊年加碼75%，每位員工分到2000蚊到1萬不等，連未過試用期都有份。不過翠華亦計劃喺農曆新年之前加價3%，實質加幅1到5蚊左右。佢話公司舊年5月加咗一次價之後，樣樣食材都加晒價，「淨係牛肉、豬肉都貴到嚇親人！」所以要加價轉嫁成本畀消費者。唔知凍奶茶今次會唔會突破20蚊大關呢？
李華華
mailto:[email protected]