編按：是日由盧主席秘書Joycelyn執筆。
燃燒完剩餘的年假回港，一打開facebook，已被「周南」二字洗版，唔通呢位回歸前最後一任的社長……細心一看，原來係《南方周末（南周）》，因為新年特刊被批改而引發一眾編輯及記者不滿，最估唔到嘅係佢哋竟公然抗命，甚至利用網絡輿論去廣發消息，實教我深覺驕傲。
點解？因為做得傳媒，就應該要有呢種風骨，就算係一個小記者（咪就係我份前職），都應該堅守自己嘅「樽鹽」。
仗義執言 教人動容
在內地，新聞多以寫（或老）作居多，每次翻看內地新聞都不禁呵欠連連。鬼咩，內地傳媒向來緊循黨的路線，喺偉大領導之下，國泰民安，還有真實可言？既然黑可成白，改改文章又有甚麼大不了？不過，請容我大膽假設並小心推斷，今次能夠觸怒一班傳媒人，且挺身而出，相信他們定是受到極大侮辱。
禍源就係唔知邊隻騎呢領導，竟然搵個文化學識明顯低幾班的人批改文章，連我這個讀番書嘅歷史盲，都知大禹治水應該是在4000年前，而非文首所寫，無端打對折，得返2000年，呢啲先係「瘋狂歷史補習社」。之後仲要嚟句「眾志成『誠』」。For God's sake，亂寫歷史、錯字連連，難怪《南周》一眾傳媒人會被激得七孔生煙。
敢言素來就是內地政府的忌諱，更何況是媒體，其實以開明為尚的南方系早受整治。今次竟在打壓之下，還有人仗義執言，怎不動容。事件亦成為內地罕見的反對新聞審查抗爭，並迅速引起中港兩地民眾的關注。縱然《南周》收場幾可預知，但正如梁文道所言，就算明知失敗都要撐！
以南為鑑，唔知香港傳媒一眾編輯大佬會否有他朝吾軀的感受？回歸以來，唔少媒體未戰而屈，自我審查風氣瀰漫。甚者要數近日大出風頭的二奶台，轉咗股東後，越見墮落。不但製作宣傳式節目，開埋洗腦班，儼然成為中宣部工具，近日更傳出原來啲高層要求那些亞姐或藝員做陪客，否則就不會再獲派工作。呢啲不就是內地慣見的社會陰暗面？所以點解呢個台又可以繼續生存，道理簡單，因為只有那些主事者才能不分是非黑白，一直盲目騎着馬舞向大北方走。
Joycelyn