周一推介穩陣嘅首都機場（694），明顯反映晉佳避險心態進一步加強。之前恒指連續幾日高位橫行，成交亦大增，有足夠水位畀大戶完成派貨，噚日終於下跌，暫時已形成一個似樣嘅頂部，短線市況變得唔明朗，符合晉佳預測。恒指9周RSI升近80嘅嚴重超買水平，風險上升，減持股份獲利係合理之舉。一旦短線調整出現，閒閒哋要跌1000點以上，所以現階段唔應該輕言撈底加注，保持輕身上路，見步行步等買貨Signal。
股市調整初期，仲未睇得清乜嘢股份板塊比較硬淨，索性暫時唔估股。至於中長線，晉佳未懷疑大市上升能力，喺資金氾濫下，股市回升，投資者重拾信心，但估值仲未夠高，目前恒指PB只有1.55倍。觀察過去廿年，恒指市賬率（PB）介乎1至3倍，牛三頂部通常喺2.7至3倍之間，低位就1至1.5倍，牛市中段PB介乎1.7至2倍，如果單睇死數，估值仲未返回牛市正常嘅1.7至2倍水平。
恒指可見26700
不過，同過去歷史PB比較，今次有兩點要注意，第一，就係會計制度改變，近十年八年，上市公司嘅投資物業淨增加值先至納入資產淨值計算，估值水份多咗；第二，舊年股市築底，但資產價格反處於周期高位，所以上市公司賬目內，資產價格特別高。導致上市公司資產淨值處於高水平，所以唔能夠直接用牛三PB頂部2.7至3倍去預測高位。
回顧過去廿年，同目前較相似嘅港股升浪係1997年一役，當時樓價出現泡沫，推高資產負債表內嘅資產價格，所以恒指PB見2.4倍，比其餘幾次牛市三期頂部低。如果計埋投資物業重估嘅水份因素，將港股升浪頂部嘅PB打個九折，大約係2.1倍，恒指去到97年咁亢奮嘅水平，就可以去到31000。
如果閣下認為港股好難去番97年高位咁癲，咁保守不如再打個折，估PB 1.8倍好未？恒指都有條件升到去26700，作為中長線投資者，目前最好分段逢低吸納。
晉佳
本欄逢周一、三及五刊出