梁金成，北區反水貨關注組召集人。月前響應網上召集，自發成立關注組，成員包括斯文OL、學生哥、倉務員、師奶等等，名副其實的義勇雜牌軍，「人人為口奔馳，唔係忍無可忍，放工返屋企睇電視好過！」自發到車站派傳單，做「架樑」扮排隊，阻水貨客入閘；連聖誕佳節，也要犧牲大好假期出動。為保家園，辛苦過做兩份工！記者：呂麗嬋
跟梁金成行動，一是唔怕夜，二是唔怕鬧大交。「我住粉嶺，西環返工，就算6點準時放，都要8點先嚟到上水，其他成員要返工返學，冇8點都唔得。至於話喊打喊殺，最初都真係怕怕哋，但出嚟行動多幾次，練大咗個膽，有乜嘢，第一時間報警。」做倉務員的梁說。是夜，就有成員被掌摑，報警收場。
喊打喊殺 見怪不怪
「呢度啲排隊水貨客，個個熟口熟面，我哋投訴得多，𠵱家啲大件行李過閘，大都要過磅先，睇吓有冇超重，造就啲婆仔收十蚊、廿蚊，幫啲水貨客帶入月台賺水腳。頭先你哋攝記影佢，佢哋鬧我哋，一巴摑過嚟」。梁金成見慣大場面，就連站在一旁的斯文OL，也鎮定如山。人人等着警察調停備案，見怪不怪。「當你好似我咁，搬入上水住，諗住靜啲，點知日日好似打仗，你都會被訓練到同人鬧交都唔怕。」戴着口罩的OL莫小姐苦笑說。尋常的周四晚上，只因之前習近平南巡，整頓後囤積的水貨量，一夜間爆發。
蔓延各站 長期抗爭
最熱門的奶粉、洗頭水，到農曆新年熱賣的金莎朱古力，五花八門。近千水貨客就在上水東鐵站口排隊，將車站團團圍上一圈。
晚上9時，人人大包細包、肩貼肩排隊，還以為身在春節假期前的廣州車站，到處是趕回鄉度歲的民工！「成日都係咁，唔好話國家領導人嚟，之前林鄭月娥講咗兩句，截一截，好唔夠兩日，又嚟料。朝早返工上唔到車、夜晚攰極都冇位坐，等政府打救，死路一條。我哋派單張、阻水貨客排隊，其實都只係消極行動，好過坐以待斃。」連飯都未食的他說。好在也有市民送來清水鼓勵，總算有點安慰。
忍無可忍的，還有港大護理系學生羅子揚，家住上水的他，9月中在facebook發動一連兩日的「光復上水行動」，正是關注組的前身，「佔領一日半日，根本冇用，呢度，人人都係抱住做得幾多得幾多，長期作戰」。關注組工作包括鼓勵市民向港鐵舉報水貨活動，「其他鐵路站已開始見到好多人喺度分貨，呢個問題全港都要面對，咪以為唔關自己事。」羅說。
北區反水貨關注組fb網頁： http://www.facebook.com/NorthDistrictParallelImports