政府將運輸及房屋兩大範疇夾硬雙拼成一個局，已經怪雞，該怪雞局嘅副局長邱誠武前日的劏房論，就更怪雞兼涼薄，佢話香港部份劏房沒有違規，有啲劏房劏得好四正，做得幾靚。佢仲話見過一啲劏房居民，有人符合上公屋資格，但都寧願喺市區住。沙膽虹想問邱誠武，既然你都話政府未能全面掌握劏房相關數據，咁你即係唔知香港劏房中，有幾多成係合法、四正和劏得幾靚？沙膽虹敢講，非法劏房肯定佔九成九，就算之前《蘋果》影到美孚的劏房，或者好多年前天后站上蓋栢景臺的豪華劏房，都是非法劏房，其他唐樓劏房更唔使講，九成九九都係非法劏房，劏房波家族沾手過的舊樓劏房，有邊一間係有向屋宇署入過則？更是十成十非法劏房，邱誠武話有啲劏房冇違例，係exception proves the rule。
至於佢話有人符合上公屋資格，但寧願住市區劏房，則證明他不食人間煙火。唔係個個香港人都好似邱誠武上司張炳良咁，有AM車坐，所以唔怕遠，在大埔買相連豪宅，一日汽油錢連隧道費，百幾二百蚊有政府付鈔，但升斗市民一家幾口，上班返學，住在新界公屋，閒閒哋成百蚊交通費一日，梗係寧願慳交通費住市區劏房啦。
邱誠武的言論，反映政府面對非法劏房問題束手無策之餘，還掩耳盜鈴！
沙膽虹