最近政府中人及梁粉四出為施政報告吹風，聽落就知道今次係事先張揚呃人事件。
今次吹風話主打係房屋，要訂出五年房屋需求，建立土地儲備及開拓「熟地」，表面聽好合理，但建立土地儲備每年不少於2.5萬個單位，係曾蔭權兩年前施政報告提出，唔係新政策。當時梁振英認為香港大把地，用1%已搞掂，又話供應慢係建屋及規劃過程太官僚主義，積非成是。
焚化爐唔起又起 環保界中伏
半年下來佢用所有招數，最終係推高樓價，而唔係平抑樓價。選舉前佢大鑼大鼓主打房屋政策，爭取到民望，最終原來又重回舊路，用曾蔭權舊瓶新酒，即係表示半年前梁振英房策根本係呃人。房屋問題根本在土地，冇捷徑可走，今次醜婦終須見家翁。
其次主打係環保，𠵱家就認為要建焚化爐及擴建堆填區，證明當日佢又係呃人。選舉時環保界人人皆梁粉，在城大環保論壇噓爆唐英年，因為唐好老實，表明焚化爐一定要起，因源頭減廢遠水救不了近火，而梁則投環保界所好，認為由源頭減廢入手，停建焚化爐。去年6月在上屆立法會小組會議上，建制派議員為配合候任特首，將已準備上馬的焚化爐及擴建堆填區call停急煞車，令當時環保局局長邱騰華一面灰。半年之後，真相大白，梁振英環保立場又係為咗呃民望，討好環保界而亂噏，以為過咗海就神仙。
至於扶貧，重訂貧窮線、派福利及減租減差餉只不過係表面工夫，最重要政策有兩方面：一是人人三千全民退保，其次係標準工時，前者徹底解決貧困老人問題，後者提升低薪勞工收入水平，解決在職貧窮，到目前仍未見到梁振英有清晰立場。更可笑係梁粉何喜華早早替佢解畫，表示扶貧係長期工作，鬼唔知阿媽係女人，深層次問題自然要用大政策去解決。上屆政府用最低工資立法對應在職貧窮，梁振英口口聲聲話上屆扶貧不力，今次我撐行陳婉嫻，標準工時冇課交必反枱。
如果上述三大重點，都係舊一套思維以及政策，咁就真係中咗田北俊所言，梁振英特首個位真係靠呃番嚟，唔單止操弄僭建議題打死唐英年，仲係操弄政策議題開空頭支票呃民望。支票有幾多兌現，幾多彈票，下周揭曉。
添馬男