政府接二連三出招打擊住宅市場，搞到資金去晒炒舖同寫字樓，一班地產代理都轉做工商舖生意。好似做開豪宅生意嘅川喬亦唔執輸，就喺尖沙嘴用50萬開咗間工商舖分行。
不屑做劏舖
新分行噚日開張，有好多舖位投資者都有捧場，好似舖王「滔哥」黎永滔同黃海明（Michael）都有嚟，但佢哋對今年舖巿前景反而審慎咗。
滔哥同華華講，呢排好多唔熟悉舖巿嘅住宅客入嚟巿場買嘢，其實好唔健康，「投資已經有風險，但買舖風險更加大，況且𠵱家劏舖啲價炒到過晒火位！」佢呼籲想買舖嘅外行人要做足功課先好入巿，唔好盲目跟風；而佢今年仲係吼實四大零售區嘅靚舖，但一定唔會買大舖返嚟劏細賣出去。
好多人都加入劏舖行列搵銀，如將商場大舖劏開出租，Michael就話，劏場大賣，仲有好多人想買，不過佢提醒買呢類舖好大機會只可以做三成按揭，要量力而為，有實力先好入市呀！