下星期三CY就會公佈首份施政報告，呢排係咁傳話份報告冇乜料到，好似樓市，睇嚟暫時都冇得搞，只係睇住樓價係咁升。
「《經濟》以前中立啲」
中原集團創辦人施永青近日喺一個論壇度就借題發揮，佢講到明睇淡樓市，但身為報紙老闆嘅佢就話，有啲報紙近排成日報道樓價新高，其實主要係想暗寸CY嘅房屋政策做得唔好，所以就製造一個樓價係咁升嘅假象，佢仲話：「反CY就去示威，唔好攞自己啲錢去較飛！」即係叫人唔好買樓啫。
咁邊啲報紙有問題呀？施老闆就點咗四個名，話係《蘋果》、《信報》、《明報》同埋《經濟日報》，仲補多句「《經濟》以前中立啲」。咁啱《經濟》副社長石鏡泉坐正喺台下，施老闆真係唔怕得罪人。
唔只插報界，施永青連政府嘅安老按揭都插埋，仲話一早就唔睇好，「計過數嘅都唔會去做」。搞安老按揭嘅按揭證券公司真係多得佢唔少。