咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
（咖喱篇）最近阿仙奴領隊雲格講咗句嘢令我好印象深刻，佢話球隊嘅工資結構係帶有濃厚的社會主義味道，叫班球員唔好郁啲就話加人工。呢番說話令我笑而不語，阿仙奴本身就是一間全球化資本主義公司，竟然講起社會主義嚟，喺我睇嚟，佢哋似用社會主義作為藉口去剝削員工多啲。
前排睇咗本書，講起社會學家鮑曼（Zygmunt Bauman）嘅「液態系列」，我覺得佢嘅論述好似講緊阿仙奴咁。鮑曼嘅《全球化》入面話，由於資訊自由流通，投資者可以隨時到全球各地投資，所以能夠跟到資金四圍去嘅人就係上層，困喺一個地方死做爛做就係下層；一間公司只係屬於投資喺佢身上嘅人，而唔係再屬於員工、供應商，亦都唔係佢嘅所在地。以搞間工廠為例，當投資者發現成本上升，就唔會考慮員工生計、地方利益、其他人同商號會唔會受影響，就撤資搬走，除咗盈利，投資者絕對唔會同其他嘢談戀愛。
當見到阿仙奴班高層年年都加人工，年年賺大錢，但就起新球場掠水，大幅加票價，球員要求高啲人工就賣走人，無視球迷上街抗議，簡直就係同鮑曼所講嘅一模一樣，阿仙奴係一部資本主義下的賺錢機器！小弟作為球迷，我覺得球會絕對唔係富士康，唔係一間工廠咁簡單。球員同球迷對球會嗰份熱情同歸屬感絕對唔可以同普通公司與消費者嘅關係比擬；對球迷同球員無情，等於揮霍球會多年累積嘅資本，終有日會被球迷同球員唾棄，嘗到惡果。文：咖喱