阿姐汪明荃在新光戲院舉行的15場演唱會，前晚圓滿結束，阿姐繼續投入演出，但當她見到台下忠實fans拿着DV機盜錄，竟直斥對方侵權行為，又叫觀眾影相一張就夠，連米飯班主也毫不畀面，貫徹阿姐一貫的敢言作風。
汪明荃「45美麗娛樂世界」演唱會前晚在北角新光戲院完成，楊千嬅和丁子高、古明華、宣萱及張德蘭等捧場。阿姐見古明華第二度捧場即笑言：「拍劇時你又唔話鍾意我，等我加戲畀你。」千嬅和丁子高更到後台跟阿姐合照留念。而之前捧場的嘉賓則有黃偉文、華娃及其女兒黃宇詩和無綫高層梁乃鵬等。
「拍嚟攞去賣？」
前晚安哥時，阿姐身穿紅色長裙獻唱，她突然間嚴肅地指向台下第一排觀眾席某位觀眾說：「你攞住牌又用DV拍，你喺度錄影緊，你坐第一行仲錄，好唔尊重版權，快啲delete咗佢，呢度係唔可以影相，但見咁多人都影就算。你拍嚟攞去賣定攞去威？仲咁大部機，又攞住我個牌，我唔鍾意，嚟我個演唱會就唔好咁，你仲坐第一行又係fans。」
千嬅送銀紙花
之後阿姐直情落台和fans影相握手，但當有位fans上前影阿姐時，阿姐又直率地說：「影到未呀？一張咪得囉。」當晚千嬅在座，阿姐提及當年兩人交情，她表示當年第一次收銀紙是馬來西亞的fans送，而到07年，千嬅叫她的fans摺了一束銀紙花送給阿姐，千嬅亦親手摺上一朵，阿姐坦言覺得很有意思。
完騷後阿姐往慶功宴，她表示：「15場都OK，要顧及體力同聲帶，我覺得好圓滿。」提到直斥fans盜錄，阿姐說：「佢其實錄咗幾場，咁我唔係場場狀態好，同埋根本唔應該錄，唔尊重。」
採訪：黃曉妍
攝影：黃偉雄
【齊齊投選2012年娛圈風雲人物】
入面粒粒巨星，你想咀佢，定想掟蕉過去？XD
http://bit.ly/ent_2012 （電腦版）
http://bit.ly/ent_m2012 （手機版）