利物浦前晚喺英足盃第3圈作客非聯賽球隊曼斯菲，雖然贏2:1晉級，但就贏得唔多光彩，事關「阿蘇」蘇亞雷斯喺入第2球波之前明顯犯手球，不過唔知係球證馬利拿走漏眼定係認為佢冇心，結果冇吹罰佢，咁就搞到曼斯菲含恨出局。
紅軍以弱陣訪曼斯菲，連拿同謝拉特都獲准休戰，史卡迪爾及阿蘇就被列為後備；雖然係咁，佢哋靠新兵史杜列治處子戰即入波，開波7分鐘就領先1:0；之後去到59分鐘，再憑後備入替史杜列治嘅阿蘇入多球而將比數擴大至2:0。曼斯菲之後圍攻紅軍，仲喺80分鐘由馬特格連追番1球；好彩紅軍最後10分鐘都頂得住，保持勝果至完場，第4圈會對英甲奧咸。
紅軍被圍攻僅贏2:1
紅軍雖則贏2:1，但就贏得肉酸，原因係阿蘇喺入波之前，明顯係用隻右手控定個波；而入波之後，佢仲繼續做佢嘅招牌慶祝入波動作，就係錫自己隻右手。
曼斯菲龍門馬利洛話：「蘇亞雷斯入波之後喺度偷笑，好明顯佢知道發生緊乜事啦。就連佢隊友達寧都同我哋講，佢估唔到球證會走漏眼囉。」但曼斯菲領隊保羅確斯卻冇怪到阿蘇：「我唔認為蘇亞雷斯有錯，只係佢嘅本能反應，同埋做任何前鋒都會做嘅嘢。呢個係球證嘅責任。」利物浦領隊羅渣士亦話，係咪手球係觀點與角度嘅問題。佢話：「毫無疑問係手球。但係，我認為係球證同旁證覺得蘇亞雷斯唔係蓄意，所以就冇吹罰。」
阿蘇賽後隻字不提
阿蘇可能知衰，事後就對自己個手球入波隻字不提，淨係喺Twitter咁講：「我好高興球隊可以去到下一個階段。」雖然國際足協提倡公平競技，但踢波就係咁，成日有人出蠱惑，唔係個個好似拉素前鋒高路斯咁誠實認自己犯手球；就算級數高到好似阿根廷球王馬勒當拿咁，咪一樣喺86年世盃贏英格蘭2:1場8強賽，用手先開紀錄，事後仲囂到話自己嗰隻係「上帝之手」。阿蘇係唔啱，但錯就錯在球證冇明察秋毫囉。
