由球壇轉戰荷李活嘅成功例子，一定係前溫布頓硬漢鍾斯（Vinne Jones）。原來曼聯中堅里奧費迪南都好有興趣向影壇發展，仲自誇會叻過鍾斯，去到型男里安納度狄卡比奧級數，實行做狄卡里奧（DiCapRIO）喎！
想做首個黑人占士邦
現年34歲嘅里奧今季季尾就同曼聯約滿，但未有消息指佢會留隊抑或轉去第二間球會，唔通真係叠埋心水，全情投入佢嘅演藝事業？事關佢早前就講過，夢想成為荷李活明星，仲雄心壯志，要做第一個黑人占士邦；就算做唔到占士邦，佢都要做狄卡里奧（DiCapRIO）喎。被問到會唔會走前輩鍾斯嘅鐵漢路線，呢位前英格蘭國腳就咁答：「你哋似乎低估咗我嘅演戲潛質。」雖則鍾斯拍過唔少荷李活電影，包括同安祖蓮娜祖莉合作拍過《極速60秒》，但絕大部份係做配角，而且做埋啲斬柴佬角色，唔怪得里奧唔將鍾斯放在眼內。
里奧費迪南續道：「我要有啲內心戲嘅，如果好似鍾斯咁，對我嚟講絕對係大才小用，所以，我想做主角囉。如果電影公司搵我開拍全新一輯占士邦，我諗我一定唔會拒絕囉。」佢認真識揀，做占士邦有靚衫着，又有名車揸；而且，仲會同啲靚女演員演床上戲，換轉係我求大俠，都即刻𧄌飯應啦！
「雙紅會」廣告捱批
話時話，里奧費迪南同車路士嘅英格蘭後衞艾殊利高爾喺反面之前，喺09年一齊監製一部叫《Dead Man Running》嘅英國黑幫電影。聽講原本佢會粉墨登場做其中一個角色，但係曼聯領隊費格遜以會影響佢喺球場內嘅表現為由，唔畀里奧咁做，令佢錯過登上大銀幕嘅機會。里奧有傳會轉戰美職聯，咁又係，如果去美國，到時佢就可以一邊踢波，一邊發展演藝事業。
另外，美國車廠雪佛蘭為咗推廣下周日曼聯主場對利物浦嘅英超雙紅會，參考荷李活名片《奪面雙雄》嘅概念，每隊各搵4個球員，拍咗段45秒嘅廣告出嚟，但就劣評如潮。