內地上畫唔夠一個月嘅《泰囧》，票房嘭嘭聲突破11億人仔，成為歷來最賣座嘅國產電影。戲中主角之一黃渤，原來喺星爺周星馳親自執導、新春檔期上畫嘅《西遊．降魔篇》擔正，仲要係做齊天大聖孫悟空𠻹，難怪星爺揸旗兼負責製作呢套賀歲片嘅比高集團（8220）近期鑊氣十足，短短半個月升咗25%。
至於早排用3800萬買咗《西遊．降魔篇》部份股權嘅文化中國（1060），亦靜靜起革命，半個月搶高26%，名副其實未出發先興奮。
《泰囧》主要講一間公司其中兩個股東有拗撬，特登飛去泰國爭取大股東支持，因而爆出連串笑料，製作成本只係3000萬人仔，少到未必夠喺香港買一個豪宅。遲吓星爺加黃渤呢個組合會唔會創造票房奇蹟，真係要拭目以待。